Посета на Белчишко блато како дел од активнотите на програмата „Младите важни за промени“

Учениците од РЦСОО „Ванчо Питошески“ и ОСУ „Св. Климент Охридски“ денес беа во посета на Белчишкото блато во Дебрца како дел од активностите на програмата „Младите за важни промени“.

Во тој поглед, Екотуризам Охрид/Ecotourism Ohrid заедно со Општината се посветени на заштита на единственото неоштетено блато во Македонија, како и на развојот на одржливиот туризам.

Блатата го складираат CO2 којшто инаку би бил испуштен во атмосферата и со тоа сериозно придонесуваат во намалување на ефектите од климатските промени. Постојат многу извори кои се сливаат во реката Сатеска и со тоа во Охридското Езеро, хранејќи го со питка вода полна со кислород. На оваа мала површина се присутни 40 % од сите видови животни во Македонија, а новите траги од мечки или видри не се реткост.

Од Белчишта има бројни обележани патеки за планинарење и велосипедски патеки за планински велосипедизам коишто се мал дел од она што овој крај може да им го понуди на туристите од Македонија и светот, а и на охриѓани.

Изложбениот центар е опремен за посета на гости, како и за млади истражувачи. Направена е мала етноизложба и поголема изложба на природните богатства на областа. Овие ентузијасти собрале дел од Белчишкото минато на едно место, односно 500 семки од автохтони и стари видови зеленчук и овошје кои се однесени во Банката за гени на Земјоделскиот факултет и се изложени и депонирани за сегашните и идните генерации.